Арнолд Шварценегер ќе ни се врати во улогата на Терминатор уште најмалку два пати.

Поранешниот гувернер на Калифорнија и познатиот актер Шварценегер најави дека повторно ќе го игра најпознатиот киборг убиец во две нови продолженија на хит акциониот серијал.

До сега се снимени четири „Терминатори“, а Шварценегер има глумено во три од нив - четвртиот, снимен во 2009 година, мораше да го „прескокне“ затоа што и понатаму беше во политички води.

Шварценегер (65) сега најавува дека студиото „Анапурана“ ги откупило правата за приказната и дека планира уште најмалку две продолженија.

Новите „Терминатори“ ќе мораат да причекаат, затоа што Шварценегер моментално во план има снимање на шест нови филмови, меѓу кои се продолженијата на „Конан“ и „Близнаци“.